Asakalik qizga
Buramatol bog’da sizni ko’rdim qaydanam,
Bir boqdimu bilmam nedir uzildi jondan.
Burgut edim bir kechada tushdim osmondan,
Buramatol bog’da sizni ko’rdim qaydanam.
Qiqirlashib qizlar o’tar, sizdan darak yo’q,
Qirq qiz ichra biz sog’ingan qizdan darak
yo’q.
Qaylardasiz, bir ko’rmoqdan o’zga tilak
yo’q,
Buramatol bog’da sizni ko’rdim qaydanam.
Axvolimni yo’ying ana, nega yo’ysangiz,
Ayb mendami, bir qayrilib ko’nglim olsangiz.
Asakangiz ketmas-ku, bir kulib qo’ysangiz,
Buramatol bog’da sizni ko’rdim qaydanam.
Bu qanday bog’ tollari xam o’sar buralib,
Butoq – butoq kokillarga qoldim o’ralib.
Bag’rim yonib yashar bo’ldim, bag’rim
tog’ralib,
Buramatol bog’da sizni ko’rdim qaydanam.
Kuya – kuya ketar bo’ldim, sizni topolmay,
Kulbamda bir yelkangizga ro’mol yopolmay.
Kumushdayin xolingizdan bitta o’polmay,
Buramatol bog’da sizni ko’rdim qaydanam.
Endi faqat eslash boru indash yo’q sizga,
Endi men xam o’xshab qoldim bir akangizga.
Erka kelin bo’ling endi Asakangizga,
Buramatol bog’da sizni ko’rdim qaydanam. Muhammad Yusuf
|